Relzo vekin  Palestinian pawlin ram hrante dinsuah an tumnak thu cu thaisun  September ni 23 tlawngkai ni 5 ah  New York khawpi ih  United Nations General Assembly ah  Palestinian Authority President, Mahmoud Abbas cun ca in UN  Secretary General Ban Ki-Moon ih hnenah a thehlut thlangdingih, cumi hnuah UN Security Council in an pawmih UN Member hnget ram pawlin dodal tu an umlo a si len Palestinian cu ram hrante neiih hmin putter a si thlangding.

Himi thuah Isreal Prime Minister, Benjamin Natanyahu cun  Palestinian hruaitu pawlin ram hrante neih tumih UN ih dilnak an thlen tum micu an tumtah vek a silo ding a tiih, Palestinian pawlin ram hrante neih tumih UN hnenih thu an thlen mihi Juda pawlthawi rualrem awknak lamzin  hawlih biakawknak neih rero laimi tibuai leh eltai an tumnak a siih,  UN Security Council in Palestinian pawlih State hran an dilmi a fehtlangpi lo nak dingah Isreal leh US cun theihtawp suahin an kham ding a si a ti.

Isreal Prime Minister Banjamin Natanyahu cun   Isreal leh Palestinian  rualrem awknak lamzin hawlih tikcu caan reipi sung biakawknak an neih rero micu Palestinian pawlin an siatsuah ih an pahbal tiah a puhih, Isreal cun thildik leh rualrem awknak cu a duh bikmi a siih a sinan  Palestinian pawlin lamzin phunphun in tibuai nak an hawlih UN  ah dilin fehtlangpi khal hai sehla rualrem awknak a um hmaisat lo ah cun thildik taktak a suak theicuanglo dingih buainak in a hmuak thotho ding a ti.

US leh European Union cun  Palestinian pawlih ram hrante dinsuah an tum mihin Isreal thawi rualrem awknak lamzin an hawl rero laimi a tibuai theiih, curuangah UN ih an dilnak hi hnukdawk aw sal dingin Palestinian hotu pawlhi an rak ngenzo. US cun  UN Security Council in himi thu fehtlang dingih vote hmuh ttulzat Member 15 sungih Vote 9 a hmuh khallen  US cun V2 Power vote hmangin a hlawnthlak sak thotho ding tiah a rak simzo.

US President Oabma khalin Palestinian pawlin ram hrante nei dingin UN ih dilnak an thlen ding mihi hnukdawk aw sal dingin Palestinian Authority President Mahmoud Abbas ih hnenah a dilih, Obama cun  Isreal thawi an ram pahnih karlak boruak sezet relfel hmaisalo ih Palestinian pawl ram hrante dinter dingcu buainak sosang suaktertu a si a zumthu a sim.

Sept 23 ni, mizansun New York ah Palestinian Authority President Mahmoud Abbas nih US President Barack Obama cu a va tawng. Picture: AP

Cu ruangah Obama cun thil pawimawh hmaisa cu Palestinian pawlih ram hrante neih silo in Isreal thawi an karlak buaiank relfel hmaisat hi thil,pawimawh sawn a si a ti. Obama cun Palestinian pawlih dilnak vekin UN in Palestinian pawl ram hrente dindingin pawmpi sehla  Isreal thawi an ramri thuah relfel ding tamzet a um laiih, cumi hnuah  West Bank leh Gaza ihsin Juda pawl suakter dingin UN in a nawrsuak thei peimaw? tihi a ra lai dingmi leh buainak suaktheimi zohfiang hmaisat a pawimawh a si a ti

Pathian Kan Cah Nak

Tagged as: Ban Ki-Moon, Mahmoud Abbas, New Palestine